Mae pobl ifanc ledled Bwrdeistref Sirol Pen-y-bont ar Ogwr wedi rhoi sgôr gadarnhaol iawn i'w llyfrgelloedd lleol, yn ôl yr arolwg plant diweddaraf a gynhaliwyd gan Awen, gan dynnu sylw at y rôl hanfodol y mae llyfrgelloedd yn ei chwarae wrth gefnogi darllen, lles a chysylltiad cymunedol.
Rhoddodd 98% o’r ymatebwyr, rhwng 7 a 12 oed, sgôr o “dda iawn” neu “rhagorol” i’w llyfrgell leol, gan ddangos effaith gref gwasanaethau llyfrgell ar draws y fwrdeistref sirol. Disgrifiodd y bobl ifanc y llyfrgelloedd fel “lle hapus”, “hwyl” a rhywle maen nhw’n teimlo’n ddiogel, gan adlewyrchu eu pwysigrwydd y tu hwnt i fenthyca llyfrau traddodiadol.
Soniodd sylwadau eraill am y cyfleoedd darllen, yr amgylchedd tawel a chroesawgar, yr ystod eang o ddigwyddiadau, gweithgareddau ac adnoddau sydd ar gael, a chyfleusterau fel cyfrifiaduron, clybiau Lego a mannau chwarae. Roedd llawer yn cydnabod staff y llyfrgell gyfeillgar a chymwynasgar.
Adroddodd y bobl ifanc welliannau yn eu hyder wrth ddarllen, cyfleoedd i gymdeithasu gyda ffrindiau, a mynediad at weithgareddau ac adnoddau am ddim. Mae'r data hefyd yn dangos ymgysylltiad cryf mewn gwasanaethau llyfrgell craidd, gyda dros 75% o blant yn benthyca llyfrau, tra bod bron i 70% yn mynychu digwyddiadau fel amser stori a sesiynau crefft.
Mae'r ymatebion i'r arolwg yn dangos sut mae llyfrgelloedd yn parhau i chwarae rhan hanfodol ym mywydau plant drwy gefnogi addysg, gwella lles a darparu mannau cynhwysol i deuluoedd a phobl ifanc. Diolch yn fawr iawn i holl staff llyfrgell Awen sy'n gwneud i hyn ddigwydd bob dydd.
